Добавувачот на гуми во Формула 1, Пирели, се чини дека ќе се соочи со конкуренција за официјалниот тендер на ФИА од 2025 година, по сугестиите дека Бриџстон дал понуда.
На почетокот на оваа година, ФИА го отвори тендерскиот процес за официјалниот договор за набавка на гуми во Ф1 од 2025 до 2027 година, со можност истиот да биде продолжен до 2028 година.
Крајниот рок за апликанти беше 15 Мај, при што ФИА сега минува низ процес на евалуација на предлозите од заинтересираните страни пред да истакне кои се одобрените понудувачи на 16 Јуни.
Успешните кандидати потоа ќе преминат во следната фаза од процесот, која ќе вклучува дискусии со носителот на комерцијалните права на Ф1.
Последниот тендер за гуми, од 2020 до 2023 година, го доведе Пирели до предизвик од јужнокорејската компанија Ханкок.
На Пирели потоа му беше одобрено продолжување на една година до крајот на 2024 година поради доцнењето во воведувањето на новите технички прописи поттикнати од пандемијата на КОВИД.
Со истекот на рокот за апликанти за тендерот од 2025 до 2027 година, се подразбира дека Пирели не е сам во понудата за новиот договор за гуми.
И додека од ФИА нема потврда за бројот на кандидати, ниту за нивниот идентитет, изворите сугерираат дека јапонската компанија Бриџстон се пријавила.
Бриџстон последен пат беше вклучен во Ф1 од 1997 до 2010 година и беше единствениот снабдувач од 2007 година наваму по одлуката на Мишелин да се откаже од шампионатот на крајот на 2006 година.
Откако ја напушти Ф1, Бриџстон остана вклучен во главните јапонски категории, како и во други меѓународни серии. Нејзиниот бренд Firestone е единствениот снабдувач на ИндиКар.
Зборувајќи за Motorsport.com неодамна, менаџерот за планирање на моторспортот на Бриџстон, Eичи Сузуки, изјави дека компанијата ја проценува вклученоста во други серии, вклучително и Формула 1.
Секогаш размислуваме за тоа што и како најдобро можеме да ги вклучиме нашите моторспорт активности во глобалните категории, вклучително и Ф1. Се разбира, ние спроведуваме истражување за такви работи.
Од самата компанија Бриџстон, сепак, одбија да потврдат дали тој интерес се проширил до формално аплицирање за тендерскиот договор за гуми.
Портпаролот на компанијата рече:
Бриџстон има наследство од повеќе од 60 години во моторспортот и ние ќе продолжиме да ги следиме одржливите глобални активности во моторспортот. Сепак, се воздржуваме од коментари за некои одредени категории.